Listamaður vikunnar hefur hluta af vegg í skólahúsnæðinu til umráða í eina viku og getur birt þar verk sín. Nemendur eru hvattir til þess að nota tækifærið og gera ýmiskonar tilraunir með útfærslu og framsetningu á verkunum.
Listamaður þessarar viku er Guðný Maren Valsdóttir nemandi á Námsbraut í skapandi ljósmyndun 2. Hún sýnir verk sem hún vann í vinnustofunni Að vinna með safn en þar var það myndlistarmaðurinn Unnar Örn Auðarson sem vann með nemendum. Markmið áfangans var að vinna með safn mynda sem þegar var til orðið með einhverjum hætti.
Maren segir: Frændi minn er portrettsería sem var unnin úr sextíu ára gömlum filmum frá fjölskyldunni minni.
Við vinnslu á myndunum skannaði ég filmurnar inn og prentaði út myndirnar, speglaði myndirnar í myndvinnsluforriti, prufaði að mála á þær og að nota glimmer. Svo tók ég aftur myndir af þeim og stækkaði upp á bómullarpappír og saumaði í þær.
Instagram: @marenvals
