Við lok náms á Námsbraut í skapandi ljósmyndun 1 taka nemendur áfanga sem nefnist Lokaverkefni. Þar er markmiðið að samþætta alla námsþætti námsbrautarinnar og að gefa nemendum tækifæri til þess að fara í gegnum ferlið frá hugmynd til fullbúins verks með eina af hugmyndum sínum.
Nemendur velja eitt af skilaverkefnum námsársins og fá aðstoð við að útfæra það til sýningar á Uppskeruhátíð. Það var Claudia Hausfeld sem vann með nemendum í áfanganum.
Telma Haraldsdóttir – Mín arfleifð
Verkið Mín arfleifð er sjálfsmynd og fjallar um erfðir. Höfundur hefur verið að rýna í eigin erfðir; bæði hlutina sem við erfum sem og genin eða persónueiginleikana sem við fáum í vöggugjöf.
Uppsetningin er vísun til greftrunarsiða þar sem ýmsum hlutum er raðað í kringum fólk. Allir hlutirnir í kringum Innhverfakonuna eru partur af söfnunaráráttu höfundar og eru keyptir, fundnir og útbúnir af honum. Orðin á verkinu eru handsaumuð og eru tekin úr minningargrein fjölskyldumeðlims. Þau endurspegla eiginleika sem eru algengir innan fjölskyldunnar.
