Við lok náms á Námsbraut í skapandi ljósmyndun 1 taka nemendur áfanga sem nefnist Lokaverkefni. Þar er markmiðið að samþætta alla námsþætti námsbrautarinnar og að gefa nemendum tækifæri til þess að fara í gegnum ferlið frá hugmynd til fullbúins verks með eina af hugmyndum sínum.
Nemendur velja eitt af skilaverkefnum námsársins og fá aðstoð við að útfæra það til sýningar á Uppskeruhátíð. Það var Sonja Margrét Ólafsdóttir sem vann með nemendum í áfanganum.
Melkorka Embla Hjartardóttir er ein þeirra sem nú útskrifast af Námsbraut í skapandi ljósmyndun 1.
Lokaverkefni hennar heitir Ég gekk um með blóm í fjóra daga. Það byggði á verkefni í áfanganum Aðferðir við listsköpun sem Melkorka tók fyrr á námsbrautinni. Verkið var í þessari útgáfu samsett af myndum á vegg og viðarplötu ásamt bókverki.
Melkorka Embla segir:
Ég sótti ryðgaða klappstóla í geymsluna mína, ætlaði að sækja bjór í geymsluna hennar mömmu en þar var einungis til freyðivín og powerade. Ég rak peysuna mína utan í ljósgulan vegg sem vinur var að mála og þreif hana í vaskinum uppi. Í Nauthólsvík var maður að æfa kung fu, ung kona í litlu bikiníi óð í volga sjónum á meðan fullklæddur vinur og vinkona fylgdust með henni í flæðarmálinu. Blómin gleymdust á mælaborðinu yfir nótt og ég hætti að vökva þau eftir það.
/sr.