Sýning á útskriftarverkum þeirra nemenda sem útskrifast frá Ljósmyndaskólanum í desember 2025, opnar í Ljósmyndasafni Reykjavíkur þann 12. desember og stendur til 11. janúar 2026.
Á sýningatímanum bjóða útskriftarnemendur upp á leiðsgnir um sýninguna.
Aðgangur er ókeypis og öll velkomin.
Sýningarstjóri er Katrín Elvarsdóttir.
Elva Þrastardóttir er ein þeirra sem nú útskrifast frá Ljósmyndakólanum.
Útskriftarverk hennar nefnist Uppspretta.
Mér er skutlað í kálgarðinn og skilin eftir þar.
Ég skríð á milli kálhausanna og reiti arfa.
Það er svo mikið eftir.
Ég verð hér í marga daga ef ég á að komast yfir þetta allt.
En kálið er að deyja, það drukknar í arfanum og ég verð að bjarga því.
Verkið Uppspretta á rætur sínar í kálgarðinum þar sem ég ólst upp. Foreldrar mínir rækta grænmeti á Flúðum og þar vann ég frá unga aldri. Ég eyddi miklum tíma í kringum kál og heillaðist af áferð kálblaðanna og æðum þeirra. Þessi áhugi á smáatriðum í náttúrunni hefur fylgt mér síðan og mótað sjónræna nálgun mína í ljósmyndun.
Fyrir verkið vann ég fjölbreyttar tilraunir með kál til að kanna efnisleika þess og möguleika – hvernig það bregst við tíma, birtu og meðhöndlun. Þannig tóku blöðin á sig ný form, liti og áferðir. Uppspretta er bæði persónuleg minning og rannsókn á umbreytingu – á því hvernig eitthvað hversdagslegt, eins og kálblað, getur fengið nýja merkingu.
/sr.