Listamaður vikunnar hefur hluta af vegg í skólahúsnæðinu til umráða í eina viku og getur birt þar verk sín. Nemendur eru hvattir til þess að nota tækifærið og gera ýmiskonar tilraunir með útfærslu og framsetningu á verkunum.
Listamaður þessarar viku er Guðrún Sif Ólafsdóttir, nemandi á lokaönn náms á Námsbraut í skapandi ljósmyndun 2. Hún sýnir verkið Untitled sem er verk sem hún hefur verið að vinna að undanfarið.
Guðrún Sif segir þetta um verkið:
Verkið Untitled er unnið frá munstrum og formum í íslenskri náttúru. Hægt er að túlka verkið á margvíslegan hátt og vil ég sem höfundur gefa, að þessu sinni, sem minnst upp um eigin hugleiðingar varðandi það.
Áhorfandanum gefst því kostur á að rýna sjálfur í verkið og að finna sína eigin túlkun út frá eigin innri neista og hugmyndaflugi.
Hægt er að skoða fleiri verk Guðrúnar og að fylgja henni á Instagram reikningi hennar @gsifolafs