Samstarf Ljósmyndaskólans og fataverkefnis Rauða krossins.
Hluti af námi nemenda á Námsbraut í skapandi ljósmyndun 1 við Ljósmyndaskólann er áfanginn Að lesa í og skapa ljós. Þar er unnið með eitt meginverkfæri ljósmyndarans ljósið. Nemendur læra þar að lesa í ljós og að beita því við myndatökur, að nota mismunandi ljósgjafa og blanda saman ólíkum ljósgjöfum.
Áfanginn er í fjórum hlutum og er kenndur af tveimur kennurum auk gestafyrirlesara.
Það er í síðasta hluta áfangans sem nemendur vinna undir handleiðslu ljósmyndara að þessu samstarfsverkefni með fataverkefni Rauða krossins.
Að þessu sinni leiðbeindi Saga Sig. nemendum.
Verkefnið er hópaverkefni og felst í því að nota fatnað frá verslunum Rauða krossins í myndatökum, búa til áhugaverðar myndir sem vekja athygli á verkefninu og inntaki þess. Myndirnar eru svo notaðar á vegum Rauða krossins til að vekja athygli á verkefninu.
Með fataverkefni Rauða krossins er verið að gefa fötum nýtt líf, endurnýta, sporna við sóun og með því meðal annars að stemma stigu við hnattrænni hlýnun.
Öll innkoma af sölu á notuðum fatnaði í verslunum Rauða krossins fer til góðgerðarmála eða hjálparstarfs á vegum Rauða krossins.
Helgi Vignir Bragason instagram: @helgi.vignir, Sigríður Hermannsdóttir, instagram: @sigridurhermannsss og María Björt Ármannsdóttir, instagram: @maria.bjort.armannsdottir unnu verkefni sem þau nefndu Réttlæti.
RÉTTLÆTI: Verkið Réttlæti er undir áhrifum á tökustaðnum sem að er fyrrum hæstaréttarhús Íslands að Lindargötu 5. Settar eruupp óræðar sviðsmyndir af einstakling í samtali við rýmin sem hún er staðsett í. Myndirnar vekja upp spurningar þar sem einstaklingurinn á myndunum er bæði kvenlæg og karllæg á sinn hátt. Með því að para það við staðsetninguna vekur það athygli á stöðu kvenna í réttarkerfi fortíðar og nútíðar.
/sr.