Sýning á útskriftarverkum þeirra nemenda sem útskrifast frá Ljósmyndaskólanum í desember 2025, opnar í Ljósmyndasafni Reykjavíkur þann 12. des. kl. 16.00.
Sýningin stendur til 11. janúar 2026 og á sýningatímabilinu bjóða útskriftarnemendur upp á leiðsagnir um sýninguna. Sjá nánar um það á síðum Ljósmyndasafns Reykjavíkur og miðlum Ljósmyndaskólans.
Aðgangur er ókeypis og öll velkomin.
Sýningarstjóri er Katrín Elvarsdóttir.
Gunnar Ragnarsson – Vegferð
Í heimi stöðugra tengsla
sitja menn við skjái.
Andlitin lýsast upp, dofna, hverfa.
Fjarlægðin mælist ekki í kílómetrum,
heldur augnaráðum sem mætast ekki.
Í Tókýó býr þögnin í hávaðanum.
Ljós og hreyfing flæða saman,
fólk gengur án þess að sjá hvert annað.
Skuggar renna yfir veggi,
tíminn hreyfist áfram.
Enginn lítur upp.
Ljósmyndin varðveitir þessi augnablik,
ekki til að stöðva tímann,
hann líður,
minning um það sem var.
myrkrið nálgast hægt
ég geng hljóðlega áfram
hverf eins og ljósið
/sr.