Listamaður vikunnar hefur pláss í skólahúsnæðinu til umráða í eina viku og nemendur hvattir til þess að sækja um og að nota tækifærið til að gera ýmiskonar tilraunir með útfærslu og framsetningu á verkunum sínum.
Verkefnavalið er fjölbreytt og nemendur sýna skilaverkefni úr áföngum námsins eða önnur verkefni sem þau eru að vinna að.
Listamaður vikunnar er Kristín Gjöverå, nemandi á Námsbraut í skapandi ljósmyndun 2 hún sýnir verkefni sem hún vann í vinnstofunni Athafnasvæði fyrr á þessu námsári.
Það var Sadie Cook sem leiddi vinnuna í áfanganum.
Markmið áfangans er nemendur læri að treysta ferli í óvissu. Kynnist nýjum möguleikum í persónulegri nálgun á listsköpun, viðhorfi og aðferðum í tjáningu með myndmiðlinum og hljóti þjálfun í að vinna saman í hóp með það að markmiði. Ekki síst er þó markmið áfangans að opna hverjum nemanda skýrari sýn á sjálfan sig og persónulega sköpun og að auka með því nánd og innsæi sem nýtist sem verkfæri í myndsköpun.
Kristín segir þetta:
Mig langaði að skoða barnæsku mína og mína líðan gagnvart henni í þessu verki. Það er sett upp eins og fjölskyldualbúm en myndirnar eiga misvel heima í slíku albúmi. Sumar myndirnar eru breyttar og bjagaðar og bjögunin eykst eftir því sem líður á albúmið.
Verkið er án titils.
Hér fyrir neðan má sjá nokkrar síður úr albúminu.
/sr.